قلم رصاص

قبضوا على قلمى
وعصبوا له عنيه
وف اول المحضر...
سألوه بتصرخ ليه؟
وقبل مايفكر
سلم عليه مخبر
أستيكته...شمع أحمر
مابتفارقش إيديه.
وكترت الأسئلة....
وإختلفت الأنفاس
إسمك؟؟؟؟؟
قلم
نوعك؟
رصاص
إقامتك؟
بين صوابع الناس
_ رصــــــــــــاص ونــــــــــــــــــاس؟!
عرفت أهدافكم إيه.
جاوب بسرعة
قوللى مين بيمولك؟
وكلب مين اللى براك
وإستعملك؟
حاترد؟
والا أقصف رقبتاك وأعدلك؟
قال القلم....
أقسملك إنى برىء يابيه
كل اللى قلته
إنى محتاج الورق
أكتب عليه إن الحقيقة بتتخنق
تقبل سيادتك
إن حلمك يتسرق؟
أو شفت سبع
إتحكم الكلب فيه؟!
إسمع يابيه...
الضرب ف الميت حرام
وأنا ف زمان العولمة
ماليـــــــــــــــــــــــــــــــش نظام
عندك قانون يمنعنى حتى م الكلام؟
حااقولك ايه!!
إعمل قانون إعدمنى بيه
اللى أعرفه
ان المحقق قاله تسلم
رجعلى تانى فرحت بيه
وحاولت أرسم
وجيت أحطه ع الورق
لقيته أبكم
وخد نفس
وبص لى
وغمض عنيـــــــــــــــــــــــــــــــــــــه